Биыл 11 айда елімізде 36,2 млрд теңге сомасына 77,6 мың отбасындағы 411,3 мың адам атаулы әлеуметтік көмек алды. Бұл туралы Орталық коммуникациялар қызметіндегі брифингте Еңбек және халықты әлеуметтік қорғау вице-министрі Олжас Анафин айтты, деп хабарлайды kaskelen.kz тілшісі.
— Өңірлер бөлінісінде АӘК алушылардың көбі Түркістан облысында — 20,3%, Шымкент қаласында — 11,3%, Қызылорда облысында — 8,2%, Алматы облысында — 7,9%, Жамбыл облысында — 7,5% және Жетісу облысында — 7% байқалады. Бұл өңірлерге жалпы алушылар санының 62,2 пайызы тиесілі, — деді вице-министр.
Оның сөзінше, АӘК алушылардың 55 пайызы қалалық жерлерде, ал 45 пайызы ауылдық жерлерде тұрады.
— Әлеуметтік мәртебелер бөлінісінде АӘК алушылар арасында көбі балалар — 273,9 мың адам немесе 66,6 пайыз. Сондай-ақ алушылар қатарында өтініш берген сәтте жұмысы бар адамдар — 14,3%, балаларға, мүгедектігі бар адамдарға, қарттарға күтім жасайтын адамдар — 12,2%, мүгедектігі бар тұлғалар — 0,6%, зейнеткерлер — 0,2% студенттер — 3,9%, жұмыссыздар — 1,4% және басқа санаттағы адамдар — 0,8%, — деді Олжас Анафин.
