Сала мамандары кадр тапшылығының туындауы заңдылық екенін алға тартып отыр. Өйткені, елімізде мұнай-газ бағытында кадр даярлайтын оқу орны жоқ. Компаниялар амалсыздан өз ордасында кішігірім даярлық мектебін ашып, қызметкерлерін шетелге тәжірибе жинақтауға жіберетін көрінеді, деп хабарлайды kaskelen.kz тілшісі.
Орталық коммуникациялар қызметі алаңында өткен брифингте Қазақстан мұнай сервистік компаниялар одағы президиумының төрағасы Рашид Жақсылықов кадр даярлауға бас мән беру маңызды екенін атап өтті.
«Қазақстан мұнай-газ саласы – еліміздің экономикасының негізі. Қазір бұл салада 250 мыңға жуық азамат жұмыс істейді. Десе де, кадр тапшылығы жоқ емес. Әсіресе, білікті инженерлер қажет. Бұл мәселе әлемнің көптеген елдерінде де бар», – деді ол.
Оның сөзінше, Қазақстанда жобалау жұмыстарын жүргізу жоғары маңызға ие. Қоғамда «жобаны қай компания жүзеге асырады, қай компанияның өнімі сатылып алынуы керек?» деген сұрақтар жиі туындайтын көрінеді. Осы орайда, ел Президенті Қасым-Жомарт Тоқаев осы мәселелерді қолға алуды тапсырған. Оны іске асыруда бірнеше қиыншылық бар.
«Бұған дейін Қазақстанның жобалау компаниялары тек қана бейімдеу жұмыстарымен айналысып келді. Шетелде дайын жоба әзірленіп, елге әкелінді. Бізде жұмысшыларды, кадрларды дамыту мәселесі өте күрделі. Бейімдеуге және жобалауға керекті техника екеуі екібөлек дүние. Сондықтан жобалау компанияларын техникалық қамтамасыз ету керек», – деді спикер.
Рашид Жақсылықовтың айтуынша, Қазақстандағы мұнай өндіруші компаниялардың өнімі 4%-дан аспайды. Сол үшін алдағы уақытта өндірушілер мен тұтынушылардың байланысын нығайту көзделген. Саладағы кәсіпорындарды 3 алпауыт операторлармен таныстырып, олардың арасында ынтымақтастық орнату жоспарда бар.
«Соңғы 3 айда бүкіл аймақты аралап шықтық. Тіпті, Солтүстік Қазақстанда мұнай саласына сіздердің өнімдеріңіз қажет дегенде таң қалдырған өндіріс орындары да болды. Сондықтан бұл жұмысты жалғастыруымыз керек. Қазақстанда өндірілді деген сапалы тауар көп болу керек деп есептейміз», – деді Рашид Жақсылықов.
