Туризм және спорт министрлігінің мәліметі бойынша, былтыр Қазақстанға туристік мақсатпен 15,3 миллион шетелдік қонақ келген. Бұл – жұмыс бабымен немесе тұрақты тұруға келгендерді есептемегендегі көрсеткіш. Негізінен Қазақстанға ең көп турист Қытайдан келеді, деп хабарлайды kaskelen.kz порталы.
Туризм және спорт министрлігі Қазақстанға туристер саны ең көп келетін елдердің бестігін атады. Олардың арасында қытай көш бастап тұр.
2024 жылы Қазақстанға 655 мың Қытай азаматы келді. Визасыз режимнің енгізілуі және екі ел арасындағы әуе қатынасының артуы туристер санының едәуір өсуіне ықпал етті.
Үндістан халқы да Қазақстанға келуге мүдделі. Өткен жылы біздің елге 146 мың Үнді туристі келді. Елдер арасындағы тікелей рейстер, визалық режимді жеңілдету және туристік бағыттарды дамыту Үндістан азаматтарының біздің елге деген қызығушылығын арттырды.
Үшінші орында – Түркия. Өткен жылы Қазақстанға 130 мың түрік азаматы келген. Бұған тұрақты әуе қатынасы және мәдени және іскерлік байланыстардың нығаюы ықпал етеді.
Қазақстанға келетін туристер саны бойынша Германия төртінші орында. Өткен жылы біздің елге Германиядан 92 мың турист келді. Олар әсіресе этнотуризмге, Қазақстанның табиғи және мәдени нысандарына қызығушылық танытады.
Бесінші орынды Оңтүстік Корея иеленді. 2024 жылы Қазақстанға Оңтүстік Кореядан 40 мыңға жуық турист келді. Оңтүстік Кореядан келетін туристер саны жыл сайын тұрақты түрде өсіп келеді. Бұған екі ел арасындағы тікелей рейстердің болуы, визалық режимді жеңілдету, сондай-ақ қазақстанның табиғатына, ұлттық тағамдары мен мәдени мұрасына деген қызығушылықтың артуы ықпал етеді.
Қазақстанға туристік мақсатта келген 15,3 миллион шетелдіктің 10,4 миллионы елде бір тәуліктен астам тұрып, шетелдік туристер санатына енген. Ресми статистикаға сәйкес, шетелдік қонақтардың елде орташа болуы 4 күнді құрайды.
