Белгілі кәсіпкер, психолог Ахметбек Нұрсила мешітке барып, уағыз тыңдайтын адамдар туралы пікір білдірді, деп хабарлайды Kaskelen.kz
Кәсіпкер әлдебір аудио хабарламаны тілге тиек етті. Айтуынша, онда автор мешітке жиналып алып, уғағыз тыңдайтын еркектерді жерден алып, жерге салған.
“Әлеуметтік желіде бір аудио тарап жүр. Оның авторы кім екені белгісіз, тек дауысы арқылы әйел адам екенін ғана аңғаруға болады. Онда дінге қатты беріліп кеткен кей қазақтың жағдайы туралы сөз етіледі. Аудиода былай дейді:
“…Мынау 30 жылдан бері өте көп ертегі пайда болып кетті ғой. Бір жап-жақсы ертегіні айтып келе жатып, ортасына арабтың идеологиясын қосып жібереді. Біз адамдардың рухын езіп, ертегі еліне айналып кеттік. Еркектер мешітте отырып алып, ертегі тыңдайды, Құдай-ау… Сондай ұлтқа айналып кеттік. 30 жылдың ішінде қалың еркек еңбек етпей, технология ойламай, мешітке барып ертегі тыңдайтын дәрежеге жеттік. Ұят емес пе”, – делінген жазбада.
Аудио хабарламада автор ер азаматтар молданың ертегісін тыңдаудың орнына, тірлік істеп, даму керегін айтады-мыс.
“Сен ешкімге қиянат жасамасаң, ешкімді буындырып, ешкімді өлтірмесең, қанына қалмасаң, ешкімнің ақшасын алмасаң, сенде қайдағы күнә? Не күнә адамда? Біреудің ақысын алмасаң, түзу жүрсең, заңға бағынсаң, ата-анаңды сыйласаң, балаңа мейірім төксең, қайдағы күнә? Неге күнәһар сезінеді бізде қазақтар өзін? Неге бір жерге жиналып алып, ертегі тыңдайды? Мен түсінбеймін. Мен дінге қарсы емеспін. Неге қорқасыңдар? Неге күнәһармын деп рухтарыңды езесіңдер? Түк күнәсі жоқ қазақтың. Осы күнге дейін езілгеніміз жетеді. Құдайдың бізге беретін шағы болды. Тек екі қолымызбен еңбек етсек қана бізге Құдай береді.
Ел арасында осындай да пікірлер бар. Ал онымен келісу не келіспеу әркімнің өз еркінде”, – дейді автор.
Кәсіпкер желідегі парақшасында жариялаған бұл жазба көпшіліктің талқысына түсті.
“Бұл ертегі емес, Құраннан аят”, “Дұрыс айтады, артқа кетпей алға жүру керек”, “Осыларға халықтың әсіресе жастардың санасын улағаны үшін қатаң жаза тағайындау керек”, “Ақыл-ойының жеткен жері осы болса не істейсің”, “Тарих, ата-бабамыздың өмірі де ертегі ме сонда”, – деп түрлі пікір қалдырды желідегілер.
