Алматы облысында 4-сынып оқушысы дәрі ішіп өз-өзіне қол жұмсамақ болды, деп хабарлайды Kaskelen.kz
Бұл дерек әлеуметтік желіде таралды.
10-шы қыркүйек күні Талғар ауданы Бесағаш ауылындағы №29 мектеп оқушысы қоштасу хатын жазып, бір қорап аспирин ішкен соң жатып қалған. Әжесінің сөзінше, мұндай әрекетке баруына мектептегі қорлық себеп болған.
“Бала өзіне қол жұмсамас бұрын қоштасу хатын жазып, бір қорап аспирин ішіп алған. Анасы баласын ауыр халде тапты” – делінген хабарламада.
Облыстық білім басқармасының мәліметінше, арнайы жұмыс тобы құрылды. Олар қажетті талдау, зерттеуді жүргізеді. Сонымен қоса барлық мектептерде профилактикалық жұмыс қолға алынды.
Ал полиция тергеу жүріп жатқанын мәлімдеді. Сонымен қатар тиісті сараптамалар тағайындап, жедел-іздестіру шараларын жүргізіп жатыр екен.
Қазіргі таңда оқушының жағдайы қалыпты. Бүгін сабаққа қатысқан. Онымен мектеп мұғалімдері, психологтар, мейірбике жұмыс жасап жатыр.
