Бас прокуратура елімізде Қаңтар оқиғасына қатысты 1 396 адам сотталғанын мәлімдеді, деп хабарлайды kaskelen.kz тілшісі Қазинформға сілтеме жасап.
Ведомство ақпаратына сәйкес 574 адам жаппай тәртіпсіздіктерге қатысқаны үшін сотталған.
“Қаңтар оқиғасына қатысты тергеу әлі жалғасып жатыр. ҚР Қылмыстық-процестік кодекстің 201-бабы талаптарына сәйкес мәліметтер жария етуге жатпайды. Дегенмен, аталған оқиғаға қатысқаны туралы жеткілікті дәлелдер алынған тұлғалар қазіргі уақытта қылмыстық жауапкершілікке тартылды. Бүгінде 1 396 тұлға, оның ішінде 574 адам жаппай тәртіпсіздіктерге қатысқаны және ұйымдастырғаны үшін сотталды”, – делінген хабарламада.
Бұған қоса 12 азамат жаппай тәртіптсіздікті ұйымдастырғаны үшін бас бостандығынан айырылды.
“Осынау қайғылы оқиға кезінде 2 960 қару ұрланды. Оның 1 мыңнан астам табылды. Қалған қаруды іздеу жалғасып жатыр”, – деп нақтылады Бас прокуратура өкілдері.
