Астана қаласы Тілдерді дамыту және архив ісі басқармасының басшысы Сәкен Есіркеп «Қазақстан» шоколадының дизайнына қатысты пікір білдірді. Айтуынша, шоколадтағы бейне Мемлекеттік Туға ұқсаса да, оның барлық стандарттарына сай келмегендіктен, ресми рәміз ретінде есептелмейді, деп хабарлайды kaskelen.kz порталы.
— «Қазақстан» шоколадының болғаны – жақсы. Бұл да бір жағынан елдің символы. Бірақ біз мынаны түсінуіміз керек: Мемлекеттік Тудың өз ережелері бар. Онда күннің орналасу тәртібі, шуақ саны, түсі мен орнаменті нақты көрсетілген. Егер осы элементтердің бірі болмаса, ол ресми Ту болып саналмайды. Шоколадта көк түс пен күннің бейнесі болғанымен, бұл толыққанды Мемлекеттік Ту емес. Бірақ патриоттық сезім тудыратын әдемі өнім деп қабылдауға болады, – деді С. Есіркеп журналистерге берген сұхбатында.
Мемлекеттік рәміздерге деген көзқарас өзгеріп келеді
Сәкен Есіркеп Мемлекет басшысының бастамасымен соңғы жылдары Ту мен басқа да рәміздерді ашық қолдануға рұқсат кеңейгенін атап өтті.
— Бұрын рәміздерді балконға ілу сияқты әрекеттерге байланысты шектеулер болатын. Қазір азаматтар өз патриоттық сезімдерін еркін білдіре алады. Бүгін Астанада балкондарға 300-ге жуық Ту ілінді, қала көшелерінде 1,5 мың көк жалауша орнатылды. Қала бойынша 500-ге жуық іс-шара өтуде, – деді басқарма басшысы.
Ерекше іс-шаралар мен акциялар
Мемлекеттік рәміздер күніне орай елордада бірқатар ерекше шаралар ұйымдастырылды:
-
Еріктілер тұрғындарға викториналық сұрақтар қойып, сыйлықтар үлестірді;
-
Үй терезелеріне жүздеген Ту ілінді;
-
3 мың Рубик текшесінен алып Ту және Елтаңба бейнесі жасалды;
-
Бәйтерек маңында кешкілік «Домбыра party» өтеді.
Құқықтық ереже:
Айта кетейік, Мемлекеттік рәміздерді қорлау немесе орынсыз қолдану жағдайында заң жауапкершілігі қарастырылған. ҚР Әкімшілік құқық бұзу кодексі және Қылмыстық кодекс баптарына сәйкес, бұндай әрекеттер үшін айыппұл немесе жаза қолданылады.
