ҚР Денсаулық сақтау Министрлігінің санитарлық-эпидемиологиялық бақылау комитеті дәрі-дәрмектерді заңсыз сататын дәріханалар анықталғанын хабарлады.
«2023 жылмен салыстырғанда, қазіргі кезде дәрілік заттарға бағаның өсуі байқалды (13%), бірақ уәкілетті орган бекіткен шекті бағадан аспады. Кейбір дәрілік заттарға бағаның маусымдық өсуі анықталған. Дәрілік заттар бағасының өсуі шикізат, тасымалдау құнының өсуіне және инфляцияға тікелей тәуелді. Дегенмен кейбір дәрілік заттарға бағаның төмендегенін айта кету керек», – делінген министрліктің Kazinform агенттігіне берген жауабында.
“Халық денсаулығы және денсаулық сақтау жүйесі туралы” Кодекске сәйкес уәкілетті орган бөлшек және көтерме саудада өткізу үшін дәрілік заттың сауда атауының шекті бағасын жылына 2 рет бекітеді. Енді ҚР Денсаулық сақтау министрінің 2023 жылғы 7 тамыздағы № 465 бұйрығымен 6890 дәрілік заттың сауда атауларына шекті баға белгіленді. ҚР Әкімшілік құқық бұзушылық туралы кодексінің 426-бабына сәйкес дәрі-дәрмектерді бекітілген шекті бағадан асырып сатқаны үшін жауапкершілік қарастырылған.
«Көтерме-бөлшек сауда желісінде 2024 жылдың басынан бері дәрі-дәрмекті шекті бағадан асыра сату бойынша 12 факті анықталды, 2,1 млн теңге сомасында айыппұл салынды. Сонымен қатар шекті бағадан асыра сату фактісі анықталған жағдайда, Медициналық және фармацевтикалық бақылау комитетінің аумақтық департаменттеріне дәлелді құжаттармен (дәрі-дәрмек және сату түбіртегімен) немесе DARIKZ мобильді қосымшасы арқылы өтініш қалдыруға болады», – деп аталып өткен ведомство ақпаратында.
Еске сала кетейік, бүған дейін бірінші жартыжылдықтың қорытындысы бойынша Қазақстанда 87,3 млрд теңгеге дәрі-дәрмек өндіріліп, бұл 2023 жылдың бірінші жартыжылдығымен салыстырғанда 20,1%-ға көп екенін хабарлаған едік.
