Елімізде ЖК (жеке кәсіпкер) немесе Жауапкершілігі шектеулі серіктестік (ЖШС) ашқан кезде 96090 экономикалық қызмет түрлерінің жалпы жіктеуішін таңдауға болады. Оған эскорт қызметін пайдалану сынды әлеуметтік қызметтердің санаттары кіреді. Осы орайда Қазақстанда эскорт қызметі заңды ма деген сұрақ туындайды. Қазір ақиқаттың көзін ашатын боламыз.
Ұлттық статистика бюросының хабарлауы бойынша, эскорт қызметі Еуразиялық экономикалық одақтың шешімімен қабылданған халықаралық стандарт.
“Еуразиялық экономикалық одақ туралы шартқа №4 қосымшаның 12-тармағына сәйкес Еуразиялық экономикалық комиссия алқасы 2015 жылы 22 желтоқсанда №29 ұсынымды қабылдады. Оған сәйкес ЕАЭО-ға мүше мемлекеттер экономикалық қызмет түрлерінің статистикалық жіктеліміне қатысты “Еуропалық экономикалық қоғамдастықтағы экономикалық қызмет түрлерінің статистикалық жіктелімі” халықаралық стандартын қолдануды қамтамасыз етуі тиіс. Экономикалық қызмет түрлерін жіктеу үшін 2020 жылы 1 қаңтардан бастап Экономикалық қызмет түрлерінің жалпы жіктеуішінің жаңа нұсқасы қолданылады. Ол Қазақстанның Индустрия және инфрақұрылымдық даму министрлігінің техникалық реттеу және метрология комитетінің 2019 жылы 22 ақпандағы №68 бұйрығымен бекітілген”, – делінген хабарламада.
Бюроның мәліметіне сәйкес, Ұлттық экономиканың ерекшеліктерін көрсету үшін Экономикалық қызмет түрлерінің жалпы жіктеуішіне бесінші (96090) таңба енгізілген.
“Шаруашылық жүргізуші бірліктерді осы немесе басқа қызмет түріне дұрыс жатқызу мақсатында оларға Экономикалық қызмет түрлерінің жалпы жіктеуіші топтамаларының мазмұнын ашатын түсіндірмелер әзірленген. NACE Rev.2 жіктеліміне сәйкес “Other personal service activities n.e.c.” 96.09 класы, мыналарды қамтиды: “- social activities such as escort services, dating service, services of marriage bureau”, бұл “эскорт қызметтері, танысу және неке агенттіктері сияқты әлеуметтік қызметтерді ұсыну” дегенді білдіреді”, – делінген хабарламада.
Сонымен қатар, Ұлттық статистика бюросы эскорт-қызметтер көрсетудің заңдылығына қатысты сұрақтар өздерінің құзыретіне кірмейтінін хабарлады.
Ведомствоның сөзінше, эскорт-қызметтерді ұсыну экономикалық қызметтің жалпы жіктеуіштерінің біріне кіреді.
“Экономикалық қызметті реттеу мәселелері Ішкі істер министрінің құзыретіне кірмейді. Өз кезегінде, жезөкшелікпен айналысу үшін притондарды ұйымдастыру немесе ұстау, сол сияқты жеңгетайлық қылмыстық кодекстің 309-бабында көзделген қылмыстық жауапкершілікке әкеп соғатынын және мүлкі тәркіленіп, бес жылға дейін бас бостандығынан айыруды көздейтінін мәлімдейміз”, – делінген хабарламада.
