Жаңа астық экспорты 7,6 млн тоннаға жетті, деп хабарлайды kaskelen.kz порталы АШМ баспасөз қызметіне сілтеме жасап.
«ҚТЖ» ҰК» АҚ мәліметінше, 2024 жылғы қыркүйектен 2025 жылғы сәуірге дейінгі аралықта жаңа астық өнімі экспорты 7,6 млн тонна болды. Бұл өткен жылғы осы кезеңмен салыстырғанда 58%-ға артық (4,8 млн тонна).
Экспорт көлемінің артуы қазақстандық астыққа сыртқы нарықтағы жоғары сұранысты, сондай-ақ жеткізу географиясының кеңейіп, логистикалық бағыттардың тиімді жетілдіріліп жатқанын көрсетеді.
Экспорттың негізгі бағыттары және өсім қарқыны: Өзбекстан — 2,7 млн тонна (+29,7%, 2023 жылғы 2 млн тоннамен салыстырғанда); Тәжікстан — 1,1 млн тонна (+51%, 726 мың тоннамен салыстырғанда); Ауғанстан — 270 мың тонна (+34%, 202 мың тоннамен салыстырғанда); Қырғызстан — 181 мың тонна (екі есе артты); Иран — 889 мың тонна (2023 жылғы 54 мың тоннамен салыстырғанда 16,4 есе өсті); Әзербайжан — 569 мың тонна (5 мың тоннадан 113,8 есе өсті).
Ауыл шаруашылығы министрлігі агроөнеркәсіптік кешеннің экспорттық әлеуетін дамыту және қолдау жұмыстарын жалғастырып жатыр.
