Қазақстанда колледж студенттерінің стипендиясы 50%-ға өсті, деп хабарлайды kaskelen.kz тілшісі ҚР Білім министрлігінің баспасөз қызметіне сілтеме жасап.
“Жаңа оқу жылын 190 мың колледж студенті бастайды, оның 133 мыңы мемлекеттік білім беру тапсырысы бойынша оқитын болады. Кәсіпорындардың өтінімдері бойынша – 10 мың студент. Мемлекет басшысының тапсырмасы бойынша ағымдағы жылы мемлекеттік білім беру тапсырысы 50 мың орынға ұлғайтылды. Квота санаты бойынша техникалық және кәсіптік білім берудің 75 мың студенті оқитын болады. Айта кетейік, мемлекеттік тапсырыс техникалық мамандықтарға қайта бағдарланған. Олардың қатарында геология, энергетика, металлургия және машина жасау, көлік, IT, құрылыс, педагогика және медицина сияқты бағыттар бар. Колледж студенттерін ынталандыру мақсатында 2023 жылғы қыркүйектен бастап стипендияларды кезең – кезеңімен ұлғайту көзделген: 2023 жылғы 1 қыркүйектен бастап 50%-ға, 2024 жылы 100%-ға дейін жеткізу”, – деп хабарлады Білім министрлігі.
Ведомствоның мәліметінше, мемлекеттік тапсырыс бойынша оқитын студенттер әлеуметтік қолдаумен – стипендиямен, тамақпен және жол жүрумен қамтамасыз етілген. Сонымен қатар, колледж студенттері үшін жаңа оқу жылында 2,5 мың орындық 13 жаңа жатақхана ашылады.
