Кеше Алматыда атақты әнші, “Дос-Мұқасан” ансамблінің солисі Ақжол Мейірбековтің жаназасы мен жерлеу рәсімі өтті. Ол 25 қараша күні 73 жасында қайтыс болған еді. Осыған орай “Дос-Мұқасан” ансамблінің әлеуметтік желідегі ресми парақшасында Ақжол Мейірбековтің ұзаққа созылған ауыр сырқаттан қайтыс болғаны айтылды, деп хабарлайды kaskelen.kz порталы.
Өнердегі достарының сөзіне сенсек, марқұм өзінің дерті туралы өмірінің соңына дейін ешкімге айтпауды сұраған.
“Өте қиын жағдай болды. Сырқаттанғанына екі жылдай болыпты, бірақ мен үшін қайтыс болғаны жайлы хабар ашық аспаннан жай түскендей болды. Өйткені ол қасында жүрген жігіттердің бәріне “Менің ауырып жүргенімді ешкімге білдірмеңіздер” деп айтыпты. Былай көрген кезде жүзі жарқын, соңғы уақытқа дейін сахнаға шығып жүр, концерт беріп жүр. Ол өзінің қиындығын ешкімге көрсетпей, сондай батырлық көрсетті. Мен бүкіл қазақ халқына көңіл айтқым келеді. Біздің қазақ эстрадасында Ақжолдың орны бөлек. Оның орнын басу қиын болады”, – дейді “Дос-Мұқасан” ансамблінің бұрынғы мүшесі Мейірбек Молдабеков.
Айта кетейік, әнші Ақжол Мейірбековтің артында жары Шарипа ханым, балалары – Луиза, Сұлтан, Тимур және бірнеше немересі мен шөбересі қалды.
