Төтенше жағдайлар министрі Шыңғыс Әрінов өрт кезінде қызыл жалынды өшіруге жұмылдырылатын тікұшақтар түнде неге ұша алмайтынын айтты, деп хабарлайды kaskelen.kz тілшісі.
Бүгін Үкімет отырысында Премьер-Министр Олжас Бектенов министрден:
«Табиғи өрттерге қарсы тәулік бойы, оның ішінде әуе кемелерін тарта отырып жедел әрекет ету керек. Алайда, Төтенше жағдайлар министрлігінің тікұшақтары түнде ұшпайды. Бұл мәселені қалай шешеміз?», – деп сұраған еді.
Шығыс Әрінов бұл жайттың министрлік үшін өте өзекті мәселе екендігін атап өтті.
«Ақпан айында бұл мәселені шешу үшін түнде де ұша алатындай жағдай жасау жөнінде тапсырма берген едім. Бірақ, қазіргі таңда екі қиындық туындайды. Біріншісі – ұшқыштарды оқытудың қымбатқа түсетіндігі. Екіншісі – тікұшақты қажетті құрылғылармен жабдықтау. Осы екі мәселені Қазавиақұтқару акционерлік қоғам болғандықтан коммерциялық ұшулардың арқасында жинаған қаражаты есебінен біртіндеп шешіп жатыр. Бүгінде бір ұшқышты дайындадық. Ол нұсқаушы болды. Биыл бір экипаж толық дайын болады. Мәселені жүйелі түрде шешеміз. Бюджетке еш салмақ салмаймыз», – деді Шыңғыс Әрінов.
