Танымал әнші, продюсер Мейрамбек Бесбаев кеше өмірден өткен Ақжол Мейірбековке желіде жазба арнады. Ол “Дос-Мұқасан” ансамблі солисінің қазасын аса ауыр қабылдаған, деп хабарлайды kaskelen.kz.
Мейрамбек Бесбаев өнердегі ағасына арнаған жазбасын Instagram парақшасында жариялады.
“Қазақ эстрадасының негізін қалаған, қашан көрсеңде маңайына күлкі сыйлап, нұрын шашып жүретін Ақжол ағамызда мәңгілік мекеніне аттанды. Сіздің жарқын бейнеңіз, жадырап жүретін жүзіңіз жүректің төрінде жылы естелік ретінде сақталып қалатын болды. Жаныңыз жаннатта болсын. Қош болыңыз жақсы аға”, – деп жазды әртіс.
“АБК” тобының экс-мүшесі, әнші Ерлан Көккев те Ақжол Мейірбековты еске алып, оның жақындарына көңіл айтты.
“Ақжол ағамен өте жақын араласатынбыз. Ол кісі маған аға, әріптес әрі ұстаз болды. Сонымен қатар құда, ортаншы қызымның кіндік әкесі болды. Осындай талантты жандардың ерте кетіп жатқаны өте өкінішті. Бұл қазақстандық музыкалық мәдениеті үшін орны толмас қаза болды”, – деп жазды ол.
Сонымен қатар Жазира Байырбекова мен Диана Шарапова да Ақжол Мейірбековтың отбасына қайғыра көңіл айтты.
