Алматы облысында дауыл кезінде мерт болды деген сарбаз Алмас Шәкімовтің денесіне эксгумация жасалды. Оның туыстары жігіт адам қолынан өлгеніне сенімді, деп хабарлайды kaskelen.kz порталы КТК арнасына сілтеме жасап.
Бір жарым жыл бойы әділдік іздеп таппаған марқұмның жақындары қынжылады. Өйткені азаматтық борышын өтеуге барған көкшетаулық жігіт кісі қолынан мерт болғанын айтады.
“Алматының әскери прокуратурасынан әділдік болмады. Өзіміздің бас прокуратураға, Астананың әскери прокуратурасына, бәріне бардық. Ешқайсысынан шындық ашылған жоқ. Істі жылы жабуға тырысты”, – дейді марқұмның әжесі Күлмайда Туғанбаева.
Олар ұлдарын қара жерден қазып алуға мәжбүр болды. Айтулары бойынша, марқұмның денесінде сау тамтығы жоқ. Иығы, екі аяғы сынған, санына шеге тығылған, басы жарылған.
Жақындарының сөзінше, Алмас әскерде әлімжеттік салдарынан мерт болды.
Еске сала кетейік, 19 жастағы Алмас Шәкімов Алматы іргесіндегі полигондардың бірінде әскери жаттығу кезінде құмды дауыл басталып, мерт болған. Әскери басшылығы оның басына темір құрастырмалы палатка құлады деп рапорт берген. Кейін “Ерлігі үшін” медалімен де марапаттаған. Бірақ туғандары ол медальдан бас тартты.
