Шымкентте бір топ полиция қызметкерлері наразылыққа шықты. Сөздерінше олар командирлеріне ақшаны қайғылы оқиға мен өлім-жітімге деп жинаған. Алайда антикор мен прокуратура оларды пара берді деп жаппай жұмыстан шығарған, деп хабарлайды kaskelen.kz тілшісі КТК арнасына сілтеме жасап .
Шаһардағы екі бірдей ротаның қызметкерлері тергеудің әділ жүрмегеніне сенімді.
“Бізде Серік дегеннің әкесі қайтыс болды. Оған ақша бергем. Одан кейін Сайрамдағы, балалар үйіне ақша жинағанбыз. Оған да бергем. Иә, одан бөлек, қолма-қол ақша да бергем. 4-ші ротаның қызметкерлері осы жерде тұр. Әлімханов Қайрат дегеннің баласы қайтыс болған. Оған да ақша жинадық, үлкен сомада. Одан кейін өзі де жол апатына түскен соң, әжептәуір ақша бергенбіз”, – деді ЖПП бұрынғы инспекторы Оразәлі Алтаев.
Бірақ антикор мен прокуратура екі ротаның командирі мен 95 қызметкеріне жүргізілген тексеріс кезінде ақшаның өлім-жітімге емес, жүйелі түрде пара ретінде жиналғаны дәлелденгенін жеткізген. Нәтижесінде қос командир 7 жылға бас бостандығынан айырылған. Ал 44 қызметкер жұмыстан қуылған. Олар қысым көрген соң амалсыз пара деп мойындағандарын айтады.
“Әр кезекшілікке түскен кезде 5 мың теңгеден жиналған. Рота командиріне кезекшілікке түскені үшін. Өздерінің ішкі тәртіптері солай, заңсыз жинаған соң сотты боп отыр ғой. 2-3 күнге демалысқа шыққан кезде, әр демалысқа шыққаны үшін рота командирі 2 мың теңгеден жинап отырған. Ал айына командирский дегенге 10 мың теңге өткізген. Сөйтіп міндеттелген”, – деді Шымкент прокуратурасы басқарма прокурорының орынбасары Адай Құтымов.
