2024 жылдың 1 желтоқсанындағы жағдай бойынша жұмыспен қамтуға жәрдемдесу шараларына 627,6 мың қазақстандық қатысты. 496,2 мың адам жұмыспен қамтылды, оның 311,1 мыңы тұрақты жұмыспен қамтылды, деп хабарлайды kaskelen.kz порталы.
Еңбек және халықты әлеуметтік қорғау министрлігінің мәліметінше, субсидияланған жұмыс орындарында 185,1 мың адам жұмыс істейді. Оның ішінде 15,5 мың адам әлеуметтік жұмыс орындарына, 32,2 мың адам жастар практикасына, 108,4 мың адам қоғамдық жұмыстарға, 9,5 мың адам “бірінші жұмыс орны” жобасы аясында, 417 адам “ұрпақтар келісімшарты” жобасы аясында, 19 мың адам “күміс жас” жобасы аясында жұмысқа орналастырылды.
Еңбек нарығында сұранысқа ие дағдылар бойынша онлайн-оқыту 55,2 мың жұмыссызды қамтыды, оның 50,1 мыңы оқуды аяқтады.
Сондай-ақ, “Бастау бизнес” жобасы бойынша кәсіпкерлік негіздері бойынша оқытумен 57,5 мың адам қамтылды, оның ішінде 36,6 мың адам оқуды аяқтап, сертификаттар алды.
Қызмет саласын таңдау мақсатында 202,4 мың адам әлеуметтік кәсіптік бағдарлаудан өтті.
Сонымен қатар, ағымдағы жылдың басынан бері халықтың әлеуметтік осал топтарына жаңа бизнес-бастамаларды іске асыру үшін 400 АЕК (1 476 800 теңге) дейінгі сомаға 8 941 грант берілді.
