Талдықорғандағы полиция басқармасы бастығының кабинетінде зорланған қыздың адвокаты оқиғаның мән-жайын айтып берді. Ол Марат Күштібаевтың 27 жастағы әйелді зорлағанын дәлелдейтін айғақтар жеткілікті деп отыр, деп хабарлайды kaskelen.kz тілшісі КТК телеарнасына сілтеме жасап.
Адвокат Нұрлан Молбаевқа жәбірленуші жексенбіде хабарласқанын айтқан. Оқиғаның қалай болғанын айтып құқықтық көмек сұраған. Осыдан кейін ол басқарма бастығының басынғанын айтып, дереу ішкі істер министрлігінің қауіпсіздік қызметіне шағымданған.
Айналдырған бірер сағат ішінде бастықтың кабинетіне тінту жасалып, айғақтар анықталған. Сараптама да жасалды.
Ал жәбірленушінің қоғамдық тыныштықты бұзғаны үшін полиция бөлімшесіне жеткізілгенін адвокат жоққа шығарып отыр. 27 жастағы жәбірленушіні тыныштықты бұзған басқа адамға қарсы шағым жаздыру үшін басқармаға әкелген екен. Бірақ бастық күш қолданып, оны өз кабинетінде зорлаған. Қазір ауыр айып тағылған Марат Күштібаев тергеу абақтысында отыр. Осы қылмысқа қатысты тергеу ішкі істер министрінің тікелей бақылауында.
“Кабинетті қарап, тінткен кезде барлық айғақ зат алынды. Сараптама да жасалды. Күдікті қамауда отыр. Ал менің қорғауымдағы жәбірленуші ешқандай заң бұзбаған. Хаттама да толтырылмады. Керсінше, оған басқа адамның қоғамдық тыныштықты бұзғаны үшін полиция қызметкерлері “арыз жаз” деп өтініш білдірген. Ал ол бас тартқан. Зорлықтың кабинетте болғаны рас”, – деді адвокат Нұрлан Молбаев.
Еске сала кетейік, Талдықорған қалалық полиция басқармасының бастығы Марат Күштібаев қыз зорлады деген күдікпен ұсталған еді. Оған қатысты Қылмыстық кодекстің 120-бабы 2-бөлігі “Қызметтік міндеттерін орындау кезінде жасаған зорлау” бойынша қылмыстық іс қозғалды.
