Ресейлік журналист Тина Канделаки Telegram-арнасына жазба жариялап, “Қазақстан орыс тілін мемлекеттік деңгейде ығыстырып жатыр” деп айыптады. Шетелдік әріптесіне Динара Сәтжан жауап қайтарды, деп хабарлайды kaskelen.kz порталы.
Ресейлік журналистің сөзінше, көз бен құлақ үйреніп қалған атауларды өзгерту Балтық елдерінен бастау алған.
“Қазақстанда ақырындап орыс тілі ығысып жатыр. Түрлі орындардың орысша атауын қазақшалаған. Бұл өте қауіпті үрдіс. Одан кейін орыс мектептерін жабу, Кеңес заманында орнатылған ескерткіштерді алып тастау, орыс тілінде сөйлеуге тыйым салу секілді дүниелер бар”, – дейді шетел журналисі.
Шетелдік әріптесінің сөзіне отандық журналист Динара Сәтжан бірінші болып пікір білдірді.
Сізге ұнауы мүмкін
“Біріншіден, біз – тәуелсіз, егемен мемлекетпіз. Осындайда орыстардың: “Өзге елде өз ережеңді жүргізе алмайсың” деген мақалы еске түседі. Теміржол вокзалын қалай атайтынымызды өзіміз шешейік.
Екіншіден, Қазақстан тәуелсіздік алған жылдар ішінде Кеңес өкіметі кезінде жоғалған ана тілін біртіндеп қайтарып келеді.
Үшіншіден, орыс тілі елімізде ресми түрде қазақ тілімен тең қолданылады. Ал қазақ тілі – мемлекеттік тіл! Ол – Конституцияда бекітілген, 7-бап.
Теміржол вокзалдары өздерің жазғандай өзгертілген жоқ. Бірақ бұл – қазақ тіліндегі дұрыс аумақ атаулары. Орыс тілінің ығысуына қандай қатысы бар?! Ал біз тек мемлекеттік тілде ғана емес, орыс, ағылшын тілдерін де білеміз. Бұл біздің күшіміз!”, – деп жазды журналист.
