ҚР қаржы министрлігінің мемлекеттік кірістер комитеті қолма-қол ақшасыз төлемдерді қабылдаудан бас тарту заңсыз екенін ескертеді, деп хабарлайды kaskelen.kz тілшісі.
Кірістер комитеті ұсынған деректерге сүйенсек, Қазақстанда 2023 жылдың 11 айының қорытындысы бойынша қолма-қол ақшасыз төлемдердің үлесі 86%-ға дейін өскен (2022 жылы – 82%).
“6 жастан асқан балалар да қолма-қол ақшасыз төлемдерді белсенді пайдаланады, ата-аналардың 41,4%-ы балаларына карта рәсімдеген”, – делінген мәліметте.
Аталған комитеттің сөзінше, қолма-қол ақшасыз төлемдерді қабылдаудан бас тарту заңсыз болып саналады.
“Себебі “Төлемдер және төлем жүйелері туралы” Қазақстан Республикасы Заңының нормаларында әртүрлі төлем әдістері – банк картасы, QR төлемі немесе қолма-қол ақша қарастырылған (25-бап). Кәсіпкерлердің төлем карточкаларын пайдалана отырып төлемдерді қабылдаудан бас тартқаны үшін бірінші рет ескерту түрінде әкімшілік жауапкершілікке тарту, ал қайталап заң бұзғаны үшін 147 680 теңге (40 АЕК) мөлшерінде айыппұл салу көзделген (ҚР Әкімшілік құқық бұзушылық туралы кодексінің 194-бабы). Қолма-қол ақшасыз төлемдерді қабылдаудан бас тарту фактілері туралы мемлекеттік кірістер органдарына хабарласуыңыз қажет”, – делінген ақпаратта.
Еске сала кетейік, елімізде кәсіпкерлер жаппай мобильді аударыммен төлем қабылдаудан бас тартып жатыр. Бұған себеп – кәсіпкерлерге тапсыру міндеттелген декларация.
