Бір апта бұрын үкімет қазақстандықтардың көктемнен бастап бірыңғай уақыт белбеуіне көшетінін мәлімдеген. Алайда Шығыс Қазақстан мен Алматы тұрғындары бұл жаңалықтың өздерін қанағаттандырмайтынын жеткізді, деп хабарлайды kaskelen.kz порталы “КТК” арнасына сілтеме жасап.
1 наурыздан бастап қазақстандықтар еліміздің батыс өңіріндегі уақыт белбеуіне көшеді. Қазір Ақтөбе, Атырау, Ақтау және Оралда уақыт басқа өңірлермен салыстырғанда бір сағат артта. Шығыс Қазақстан өңірінің тұрғындары үшін таң ерте атып, кеш ерте бататындықтан бірыңғай уақыт белбеуіне өту олар үшін қолайсыз екенін жеткізді.
Алайда бірқатар ғалымдар мен зерттеушілер бірыңғай уақыт белбеуіне көшудің экономикалық тұрғыдан негізделгеніне сенімді. Олардың сөзінше, бұл өңір тұрғындары арасындағы уақытқа қатысты кедергілерді жойып, көлік жүйесі, сонымен қатар мемлекеттік органдар мен төтенше жағдайлар қызметінің координациясын жақсартады. Уақыт өте қарапайым тұрғындар да бірыңғай уақыт белбеуінің пайдалы тұстарын байқамақ.
“Адамдардың ұйқысы қанады. Әсіресе, таңғы сағат 06:00-де тұратын балалар үшін қолайлы болмақ. Ал географиялық уақыт 5-ке тең. Сол себепті 1 сағат ұзағырақ ұйықтауға мүмкіндік бар”, – дейді физиолог Асқар Калекешов.
