Алматы әкімдігі хостелдегі өрттен қаза тапқан қазақстандықтардың отбасыларына 1 миллион теңгеден бөледі, деп хабарлайды kaskelen.kz порталы.
Алмалы ауданының әкімі Айдар Жәкібаевтың айтуынша, қала әкімі қаулыға қол қойған.
“Қала әкімінің тапсырмасы бойынша марқұм болған әрбір Қазақстан азаматына мәйіттерді тасымалдауға көмек көрсетумен қатар 1 миллион теңгеден материалдық көмек көрсетіледі. Бұл қаулыға қала әкімі қол қойды”, – деді Алмалы ауданының әкімі Айдар Жәкібаев.
Қаза болған шетелдіктердің отбасыларына денелерін жерлеу орындарына жеткізуге көмек көрсетіледі.
Еске сала кетейік, бұған дейін Алматыда хостелде өрт шығып, салдарынан 13 адам қаза тапқаны айтылды. 56 адам мектепке уақытша орналастырылды. Өртенген хостелдің 1,5 ай бұрын ашылғаны белгілі болды, онда шетелдіктер тұрып келген. Министрлер кабинеті өрттің шығу себептерін анықтау үшін арнайы комиссия құрды. Сонымен қоса хостелдегі өртке байланысты қылмыстық іс қозғалғаны белгілі болды.
Сонымен қатар қаза болғандардың жеке бастары анықталды.
