Қазақстанда 11,5 мың мектепке дейінгі ұйым жұмыс істейді. Олардың балаларды қамту деңгейі 91,5%. Оқу-ағарту министрлігі 2 жастан 6 жасқа дейінгі балаларды мектепке дейінгі тәрбиемен және оқытумен қамтуды ұлғайту үшін осы жылдың соңына дейін 77 мыңнан астам жаңа орын ашу жоспарланып отырғанын мәлімдеді, деп хабарлайды kaskelen.kz порталы.
Мектепке дейінгі ұйымдарға қабылдау жыл бойы жүзеге асырылады. Астана, Алматы қалаларында және Ақтөбе, Қостанай облыстарында балалардың мектепке баруына байланысты мектепке дейінгі ұйымдарда топтарды жасақтау аяқталды. Өзге өңірлерде бұл жұмыс тамыз айының соңына дейін жалғасады.
Кезекке қою, құжат қабылдау және жолдама беру жөніндегі мемлекеттік қызметтерді жергілікті атқарушы органдар электрондық үкіметтің веб-порталы немесе ақпараттандыру объектілері арқылы көрсетеді.
