Елімізде енді педагогикалық дипломы жоқ мамандар да мектепте балаларды оқыта алады. Бұл кадр тапшылығы мәселесін шешеді деп болжанған, деп хабарлайды kaskelen.kz тілшісі Информбюро жаңалықтар бөліміне сілтеме жасап.
Мектептерге мұғалім ретінде жоғары білімді, бірақ педагогикалық білімі жоқ мамандарды тарту жоспарланып отыр. Ол үшін олар теория, практика және мектептегі оқытуды қамтитын бір жылдық курстардан өтіп, сәйкес сертификат алуы қажет. Мамандардың сөзінше, жаңа жүйе басты мәселе – еліміздегі ұстаз тапшылығын шешуге септігін тигізеді.
“Жоғары білімі бар және тиісті пәндер бойынша дайындалған мамандар ертеңгі күні жетіспейтін мұғалімдерді алмастыра алады. Бұл – бірінші мәселе. Екіншіден, басқа саладан мұғалімдердің келуі мектептегі кәсіби өмірді біршама әртараптандырады. Мұғалімдер өзара тәжірибеcін алмасады”, – дейді “Назарбаев зияткерлік мектебі” АҚ педагогикалық шеберлік орталығының директоры Жанбота Қабдыкәримова.
Сарапшылар бұл әдіс сұранысқа ие болады деп есептейді, өйткені мұғалімдердің жалақысы қазір айтарлықтай жоғары.
“Балаларды дұрыс түсінуге, сыни тұрғыдан ойлауға, өзара әрекет етуге және алған білімін дұрыс қолдануға үйретуіміз керек. Тағы бір мәселе, бұл адамдар педагогиканы қаншалықты меңгереді. Педагогика мен коммуникацияны білу толыққанды дайындық болуы керек: жай ғана белгі үшін немесе жай сертификат үшін емес”, – деп түсіндіреді “Мирас” университетінің ректоры Нүркен Халықберген.
Мұғалімдер мектеп оқушыларымен жұмыс істеу кез-келген адамның қолынан келе бермейтінін айтты. Мұғалімдерге қойылатын талап әрқашан да жоғары.
“Мектепте жұмыс істеймін деген адам моральдық-психологиялық тұрғыдан дайын болуы керек. Түрлі жағдай болады, ол осы жағдайлардан шығудың жолын табуы керек”, – дейді №65 мектеп-гимназиясының орыс тілі мұғалімі Сәуле Үсенова.
Ата-аналар да жаңашылдыққа қарсы емес. Олар ең бастысы оқудың балаларға пайдасы тисе екен дейді. Әзірге “сырттан кіру” жүйесі НЗМ-де қолдану жоспарланып отыр. Бірақ сарапшылардың айтуынша, бір жылдық оқуды аяқтап, сертификат алғаннан кейін орта мектептерге жұмысқа орналасуда еш қиындық болмайды.
