Ішкі істер вице-министрі Санжар Әділов есірткімен байланысты қылмыс үшін қамауда отырған жасөспірімдердің санын атады, деп хабарлайды kaskelen.kz тілшісі.
— Бүгінде есірткі қылмысымен 49 жасөспірім ұсталды. Қылмыстық атқару жүйесінің мекемелерінде 9 жасөспірім қамауда отыр. Олар сотталғанға дейін есепте тұрмаған және ақша табу мақсатымен қылмыс жасаған. Алматыда ондай адамдарды ұстауға арналған жалғыз колониямыз бар. Оларға дәрістер оқылып, есірткіні қолданудың салдары туралы түсіндіру жұмыстары жүргізіледі. Бұл жұмыстарға наркологтарды, психиатрлар мен үкіметтік емес ұйымдарды шақырамыз, — деді вице-министр Сенат отырысында.
Сонымен қатар, ол есірткі қылмысының салдары туралы түсіндіру жұмыстары қызу жүргізіліп жатқанын айтты.
— Жалпы, жастар арасында нашақорлықтың алдын алу ісінде қолда бар ресурстардың бәрін, әсіресе үкіметтік емес ұйымдарды, БАҚ-ты және көпшіліктің әлеуетін пайдаланамыз. Бүгінгі таңда есірткіге қарсы 15 мыңнан астам іс-шара өткізілді. Оның ішінде білім беру ұйымдары мен жоғары оқу орындарында 1 миллионнан астам адам қамтылды, — деді Санжар Әділов.
