Соңғы жылдары Қазақстанда темекі тұтынушылардың саны 30 пайызға төмендеді. Бұл мәлімет – зиянды әдеттің алдын алуға бағытталған мемлекеттік және қоғамдық бастамалардың нәтижелігін айғақтайды, деп хабарлайды kaskelen.kz порталы.
Бұл жөнінде өңірлік коммуникациялар қызметінде ұйымдастырылған баспасөз жиынында Алматы қалалық психикалық денсаулық орталығы директорының орынбасары Роза Тәтиева хабарлады.
Оның сөзіне сүйенсек, елімізде темекі шегетін адамдардың үлесі 30 пайызға азайған. Темекіден бас тартқан жастар спортпен шұғылданып, шығармашылық бағыттарға көңіл бөле бастаған. Дегенмен, спикер вейп пен электронды шылымға әуестенушілердің артқанын, әсіресе бұл өнімдердің жеткіншектер арасында кең тарап жатқанын тілге тиек етті.
– Кейбір жастар кальянды зиянсыз деп ойлайды. Бірақ бір рет кальян шегу — 100 дана темекі тартқанмен тең. Оның түтінінде никотин, шайыр мен ауыр металлдар темекідегі мөлшерден 3–5 есе көп болуы ықтимал, – деді маман.
Кальянды жабық кеңістікте пайдаланғанда, оның түтіні жұқпалы аурулардың таралуына себеп болады. Ал бір мундштукты бірнеше адамның қолдануы — инфекциялардың берілуіне тікелей жол ашады.
– Кальян – тек ағзаны улайтын құрал емес, сонымен қатар жастарды тәуелділікке итермелейтін әлеуметтік құбылыс. Ол темекіден де қауіпті, – деп ескертті Роза Тәтиева.
Мамандардың айтуынша, адам зиянды дағдыдан неғұрлым ертерек арылса, кейін оған қайта оралу қаупі соғұрлым төмен болады. Сондықтан жас ұрпақтың салауатты өмір салтына бет бұруына қолайлы жағдай жасау — мемлекет пен қоғамның ортақ әрі маңызды міндеттерінің бірі.
Оның айтуынша, темекіден арылғысы келетіндер үшін еліміздегі емханаларда 86 арнайы кеңес беру бөлмесі жұмыс істеп тұр.
