Салтанат Нүкенованың өліміне қатысты сотқа дейінгі тергеп-тексеру екі бап бойынша жүргізілді, деп хабарлайды kaskelen.kz тілшісі Vlast.kz басылымына сілтеме жасап.
Астана қаласының полиция департаменті бұрынғы ұлттық экономика министрі Қуандық Бишімбаевқа қатысты сотқа дейінгі тергеуді Қылмыстық кодекстің 110-бабының 2-бөлігі (қинау) мен 99-бабының 2-бөлігі (аса қатыгездікпен адам өлтіру) бойынша жүргізіп, аяқтады.
Сонымен қатар “Гастро-орталық” директоры болған Бишімбаевтың інісіне қатысты тергеу Қылмыстық кодекстің 432-бабы (Қылмысты жасырып қалу) және 434-бабы (Қылмыс туралы хабарламау) бойынша жүргізілді. Бұған дейін інісіне қатысты Қылмыстық кодекстің 119-бабы (Қауіпті жағдайда қалдыру) бойынша да тергеу жүріп жатқаны хабарланды.
Ішкі істер министрлігінің ақпаратына сәйкес, қазір қылмыстық іс процесі қатысушылары материалдармен таныса бастады, содан кейін іс прокуратураға жіберіледі. Басқа ақпаратты жариялауға рұқсат етілмейді.
Еске сала кетейік, бұған дейін бұрынғы ұлттық экономика министрі Қуандық Бишімбаев әйелі Салтанат Нүкенованы өлтірді деген күдікпен ұсталғаны туралы жазғанбыз. Кейіннен қылмысты жасырды деген айыппен Салтанат Нүкенова көз жұмған мейрамхананың директоры да тұтқындалды.
Сонымен қатар өз әйелін өлтірді деп айыпталған Қуандық Бишімбаевқа қатысты тергеу аяқталғаны және Бишімбаевты қамауда ұстау мерзімі ұзартылғаны туралы жазған едік.
