Қазақстандықтар енді Отбасы банкіндегі несиесін мерзімінен бұрын жауып, бірден жаңа баспанаға ипотека рәсімдей алмайды. Енді олар қайтадан депозит ашып, кем дегенде үш жыл қаражат жинауы тиіс, деп хабарлайды kaskelen.kz порталы 31-арнаның Информбюро жаңалықтар қызметіне сілтеме жасап.
Бұған дейін клиенттер несиесін ерте өтесе, қолданыстағы депозитті қайта пайдаланып, жаңа ипотека ала алатын. Алайда енді бұл мүмкіндік жойылды: несие толық жабылған жағдайда, депозиттегі ақша да соған жұмсалады. Нәтижесінде, келісімшарт тоқтатылып, шот жабылады. Ал жаңа үй алу үшін азамат қайтадан депозит ашып, жинақ бастауға мәжбүр.
“Біз салымшыларға депозит санынан, несие санынан шектеу қоймаймыз. Бір адам 10 немесе 20 депозитке дейін аша алады. Сол әр депозит бойынша несие ала алады. Бұл енді жабық жүйе болған соң, бүкіл салымшылар бір-бірін қаржыландырып, депозиттерін толықтырып, содан банк тұрғын үй займдарын береді”, – дейді “Отбасы банк” АҚ банк өнімдерін әзірлеу басқармасының бастығы Жанболат Калменов.
Жаңа талаптарды Мәжіліс депутаты Дәулет Мұқаев та қолдайды. Оның айтуынша, кейбір азаматтардың несиені бірнеше айда жауып, қайта ипотека рәсімдей беруі – әділетсіздік тудырады. Себебі баспанаға ұзақ жыл ақша жинап жүрген азаматтарға қаржы жетпей қалуы мүмкін.
“Ақшасы барлардың өзі 3 ай, 6 айда үй алып кетіп жатыр. Бұл дұрыс емес қой. Сіз барсыз мысалы, басқа да азаматтар бар айлығынан ай сайын 50 мың, 100 мың, 80 мыңдап құйып, 3-4 жыл дегенде әзер қол жеткізіп жүрген. Сондықтан сол тұрғыдан енді аналар қайта-қайта 3-4-5 үйін ала берсе, дұрыс емес қой. Одан банктің активтері де азая береді”, – дейді Дәулет Мұқаев.
