Жаңа Салық кодексін қабылдау мерзімі кейінге қалдырылғаннан кейін желіде декларация тапсыру мерзімі де кейінге қалдырылуы мүмкін деген пікірлер пайда болды. Бірақ аталған өзгерістер оған әсер етпейді, деп хабарлайды kaskelen.kz.
Мемлекет басшысы Қасым-Жомарт Тоқаев Қазақстан халқына жолдауында жаңа Салық кодексінің жобасын қабылдауды келесі жылға дейін кейінге қалдыру қажеттігін айтты.
Тоқаевтың айтуынша, мұндай шешім қабылдауға асықпау керек. Сондай-ақ, президент үкімет пен парламентте жан-жақты талқылау жүргізуді тапсырды. Ол кодекс аясында бизнесті шынымен ынталандыратын салықтық жеңілдіктердің тиімділігін арттыру қажет екенін атап өтті.
Бұл декларацияны тапсыру мерзімі кейінге қалдырылады дегенді білдіре ме?
Естеріңізге сала кетейік, жалпыға бірдей декларациялау Қазақстанда 2021 жылы басталды – ҚР Салық кодексінің 71-тарауы “Жалпыға бірдей декларация” деген атпен күшіне енді. Бұл бағдарлама бірнеше кезеңнен тұрады.
Бағдарламаға кірген жылы әрбір жаңа қатысушы 250.00 нысанын, содан кейін жыл сайын 270.00 нысанын тапсырады.
2024 жылдың 15 қыркүйегіне дейін жеке кәсіпкерлер, құрылтайшылар мен заңды тұлғалардың басшылары, сондай-ақ олардың жұбайлары кірістер туралы декларация тапсыруы керек. Ал елдің барлық халқы 2025 жылы – соңғы төртінші кезеңде қамтылатын болады.
Яғни, жалпыға бірдей декларациялау бағдарламасы бұрын іске қосылған және ҚР Салық кодексінде бекітілген. Сондықтан жаңа кодекс жобасын қабылдау мерзімдерін кейінге қалдыру салық декларацияларын тапсыру мерзіміне әсер етпейді.
Осылайша, 15 қыркүйекке дейін бағдарламаның жаңа қатысушылары 250.00 нысанын, ал бағдарламаға кіретіндер 270.00 нысанын тапсыруы керек.
