Мәдениет және ақпарат министрі Аида Балаева БАҚ өкілдерін іс-шараларға тіркеудің жаңа тәртібіне қатысты түсініктеме берді, деп хабарлайды kaskelen.kz тілшісі.
«Жалпы аталған құжат жобасы қолданыстағы ережелермен салыстырғанда аса көп өзгермеген. Мысалы, аккредиттеуден бас тарту негіздері туралы ережелерге тоқталсақ. Бұл БАҚ-тың жұмыс істеуін уақытша тоқтату немесе мүлдем жабу және ресми реестрде тіркелмегені туралы сот шешімі күшіне енген жағдайда іске асады», – деп жазды Аида Балаева Facebook парақшасында.
Одан әрі министр журналисттер арасында ең көп сұрақ тудырған жаңа ереженің 10-тармағына, атап айтқанда БАҚ өкілдері сақтауы тиіс талаптарға тоқталды.
- кез келген журналист қай БАҚ атынан аккредитациядан өтсе, сол редакцияға ғана ақпаратты жинап, жариялай алады. Алайда журналистке бірден бірнеше БАҚ атынан аккредитация алуға ешкім тыйым салмайды.
- бұл талап белгілі бір оқиғаға/іс-шараға қатысты журналистердің жеке пікірлері мен ұстанымдарын әлеуметтік желілердегі жеке парақшаларына білдіруге қатысы жоқ.
- регламент мәселесіне келетін болсақ, қолданыстағы ережелерде қазірдің өзінде іс-шараға қатысушылардың тақырыпты, уақыт тәртібін, қоғамдық тәртіпті сақтауын жүргізуші (яғни, іс-шара модераторы) қамтамасыз ететіні қарастырылған.
- ережеде әрбір мемлекеттік органның немесе ұйымның белгілі бір іс-шараның регламентін өзі бекітетіндігі көрсетілген. Бұл ретте министрлік уәкілетті орган ретінде ақпаратқа қолжетімділік қағидаттарын және журналистердің ерекше мәртебесін сақтау мәселелері бойынша аталған регламентті әзірлеу бойынша тиісті ұсыныстарын жіберетін болады.
- ерекше маңызды мемлекеттік объектілерге кіру және сол мекемелердегі режимдерді ұстану да қолданыстағы заңнаманы сақтау мен қауіпсіздіктің айнымас бөлігі.
АҚШ пен Еуропалық Одақтың және халықаралық ұйымдардың халықаралық тәжірибесі көрсеткендей, белгіленген ережелерді, сондай-ақ заңнаманы бұзған жағдайда журналист іс-шараларға қатысу құқығынан және аккредитациядан айырылады. Мысалы, Еуропарламенттегі БАҚ қызметін реттейтін ережеде түсірілімге рұқсат етілген арнайы орындар қатаң түрде белгіленген.
Сізге ұнауы мүмкін
«Қорытындылай келе, ақпаратқа қолжетімділікті қамтамасыз ету мен журналистердің мәртебесін арттыру – әрқашан министрлік қызметінің басты басымдығы екенін тағы да жеткізгім келеді», – дейді Аида Балаева.
Айта кетсек, кеше журналистерді аккредиттеу тәртібінің өзгеретіні туралы хабарлаған едік.
Еске сала кетейік, Мемлекет басшысы 19 маусымда «Масс-медиа туралы» заңға қол қойды.
