Жаңа оқу жылында елімізде 55 мың оқушыға арналған 39 жаңа мектеп ашылады. 2023 жылдың соңына дейін барлығы 132 мың жаңа оқушы орнын пайдалануға беру жоспарлануда, деп хабарлайды kaskelen.kz порталы ҚР Білім және ғылым министрлігінің баспасөз қызметіне сілтеме жасап.
Сонымен қатар, 194 білім беру ұйымына күрделі жөндеу жұмыстары аяқталады. Мемлекет басшысының тапсырмасы бойынша жыл соңына дейін шағын қалаларда, аудан орталықтары мен ауылдарда орналасқан 1000 мектеп алты бағыт бойынша жаңғыртудан өтеді: күрделі және ағымдағы жөндеу, пәндік кабинеттермен жарақтандыру, мектеп жиһаздарын, кітапханаларды, асханаларды жаңарту, сондай-ақ балалардың қауіпсіздігін қамтамасыз ету.
1000 пәндік кабинет ашу жоспарлануда, қосымша 749 пәндік кабинет сатып алынады.
Білім беру инфрақұрылымын қолдау қорының арқасында бірінші қыркүйекке қарай 25 мың оқушыға арналған 13 мектеп, 30 мың оқушыға арналған тағы 26 мектеп – жергілікті бюджеттер мен жеке инвестициялар есебінен ашылады.
Бұдан басқа, “жайлы мектеп” ұлттық жобасын іске асыру басталды, оның шеңберінде 740 мың оқушы орнына 369 мектеп салу жоспарлануда.
Айта кетейік, Мемлекет жыл сайын мектептерді салуға және жаңғыртуға қаражат бөледі. Тек соңғы үш жылда 340 мың оқушы орнына 626 мектеп пайдалануға берілді.
