Шығыс Қазақстан облыстық соты Қайрат Сатыбалдының шартты түрде мерзімінен бұрын босату туралы өтінішін қанағаттандырмады, деп хабарлайды kaskelen.kz тілшісі.
Сот Қайрат Сатыбалдының тәртіп бұзушылығы мен тұрақсыз мінез-құлқы бар екенін айтып, сондықтан бұл өтінішті қабылдау тым ерте екенін жеткізді.
“Сотталған Қайрат Сатыбалдының бас бостандығынан айыру жазасын бас бостандығын шектеумен ауыстыру туралы өтінішін қанағаттандырудан бас тартамыз”, – делінген сот хабарламасында.
Еске сала кетейік, бұған дейін бас прокурордың орынбасары Әсет Шындалиев Қайрат Сатыбалды мерзімінен бұрын босап шығуға өтініш бергенін айтқан еді. Оның айтуы бойынша, кез келген сотталушының мерзімінен бұрын босатуға немесе жазасын жеңіл түрге ауыстыруға өтініш беруге құқығы бар.
Қайрат Сатыбалдының өтініші №22 Шығыс Қазақстан облысы бойынша Қылмыстық-атқару жүйесінде қаралып жатқаны хабарланған еді.
