“Танымал әнші Бейбіт Қорғаннан ұлым бар” деген атыраулық келіншектің хикаясы ел аузынан кете қоймаған секілді. Әртіс ДНҚ тапсырып та, пікір білдіріп те үлгерді, деп хабарлайды kaskelen.kz тілшісі “Астарлы ақиқат” бағдарламасына сілтеме жасап.
Эстрада жұлдызы Атырау қаласына барып, қалалық емханалардың бірінде ДНҚ сынамасын тапсырды. Алайда бетін бүркеп, түрін тұмшалап келген. Кейін жеке парақшасында жазба жариялады. Көп уақыт өтпей онысын өшіріп тастады.
“Мұндай жағдайда бұл мәселелерді тек сот қана шеше алады. Ешкім сотқа шағым түсірмеген. Сотпен дәлелдесін”, – делінген жазбада.
Сондай-ақ оқиға басталғалы әнші оқырман саны артып, қаралымы көбейгенін айтып, мақтанды.
“Құрметті ағайын! Бос әңгімелерге көңіл бөлетін уақыт жоқ. Шаруа бастан асады. Екінің бірі ондай әңгіме айта беретін болса, не қалады?!. Бәрі заңды түрде шешілсін! Дәлелдесін! Қолдап жатқан достарыма рақмет! Осы оқиға басталғалы қаралым көбейіп, жазылушылар саны артты. Нағыз қара пиар болды”, – деп күлді өнер иесі.
Қазақ эстрадасының жарық жұлдыздары Жеңіс Ысқақова, Абай Бегей, Серікбол Сайлаубек секілді өнер иелері әншінің басына түскен сынақ дейді.
“Бейбіт оны зорламаған шығар. Ол өз еркімен қойнына кірді. Өз еркімен, дұрыс па?!. Оның отбасы барын біле тұра, әртіс екенін біле тұра сондай қадамға барды. Қолыңмен істедің бе, мойныңмен көтер. Ол әйел өзі үшін туды. Тумауына да болар еді. Неге Бейбіттің отбасы мен балаларын ойламады екен?! Балаларының тағдыры не болады?!. Бір отбасының ажырауына себепкер болып отыр”, – деп күйінді Жеңіс Ысқақова.
Бейбіт Қорғанмен отбасылық достар болып араласатын журналист Қазбек Қасым өнер иесіне хабарласып істің ақ-қарасын сұраған көрінеді.
“Егер оның баласы екені расталса көмектесер еді. Далада жатқан бала жоқ. ДНҚ сараптамасы қалай болады, сол бойынша әрекет еткен дұрыс. Мен досымнан да сұрап көрдім. “Жоқ” деп сенімді айтып отыр. Оны өзі де білмеуі мүмкін”, – дейді журналист.
Ал Абай Бегей 4-5 жыл бұрын өтіп кеткен оқиғаны неге қозғап отырған деп бейтаныс келіншекке шағымын айтты.
“4-5 жылдан кейін келіп, жала жабатындар көп қой. Анық-қанығын білу керек. Ол кезде қасында болған жоқпыз. Негізі қыз-келіншектер айналамдағы жігіттерден ақша сұрап, хабарласатындар бар екен. Соны да естігенмін. Егер баласы екені расталып жатса алиментін төлеп, әкелік жауапкершілікті арқалау керек. Бірақ Бейбіт ондай бала емес. Танымал болғасын ілініп тұр деп ойлаймын”, – дейді Абай Бегей.
