Елімізде жылына 2,7 млн тонна сүт өндіріледі. Аталған саланың қазіргі жай-күйі туралы толығырақ Ауыл шаруашылығы министрі Айдарбек Сапаров айтып берді, деп хабарлайды kaskelen.kz тілшісі.
«Мал шаруашылығы өнімдерін өңдеудегі негізгі бағыттар — сүт, ет, тері және жүнді қайта өңдеу. Жеке тоқталсақ, елімізде жылына 2,7 млн тонна сүт өндіріледі, қазір 180 кәсіпорын жұмыс істеп тұр. Былтыр жалпы сомасы 584,8 млрд теңге болатын сүт өнімдері өндірілді. Бүгінде сүт өнімдерін өңдеудің дамуын тежеп тұрған факторлар — шикізаттың жеткіліксіздігі және оның қымбаттығы. Бұл дайын өнімнің құны мен отандық өнімнің импортпен бәсекеге қабілетіне тікелей әсер етеді», — деді Айдарбек Сапаров Үкімет отырысында.
Сонымен қатар, ведомство басшысы сүт және сүт өнімдері саласында қолға алынып жатқан бірқатар жобаны тілге тиек етті.
«Импортты алмастыру және отандық сүт өнімдері қуатын арттыруда Солтүстік Қазақстан облысының тәжірибесі бойынша жобалар іске асырылуда. Жобаларды іске асыру 115 ірі тауарлық-сүт фермасын құруға, отандық сүт зауыттарын сапалы шикізатпен қамтамасыз етуге және сүт-шикізатының жеткіліксіздігі проблемасын шешуге мүмкіндік береді», — дейді ол.
