Бұл қорқынышты жайт туралы Kaskelenkz инстапарақшасына оқырмандар толассыз жаза бастады. Тілшіміз аудандық ауруханаға хабарласып мән-жайды сұрады.
Белгілі болғандай, 37 жастағы келіншек бұл қадамға баласын жоғалтып алған соң барған көрінеді. Бұған дейінгі екі жүктілігінде де шарананаларының іште жатып жүрегі тоқтап қалған. Үшінші баланы ЭКО арқылы көтерген жас ана қуанышты күнді асыға күткен. Дегенмен, ультрадыбыстық зерттеуге барғанда тағы да нәрестенің шетінеп кеткені анықталған. Аудандық ауруханаға әйел кесір тілігі арқылы баланы алдыру үшін жатқызылған.
Оқыс оқиға ота жасалғаннан кейінгі үшінші күні, 10 тамызда болған. Дәрісін қабылдауға әкелген медбикені итеріп жіберген науқас терезеге ұмтылған. Қас пен көздің арасындай қысқа уақытта үшінші қабаттан секіріп кеткен.
Қазір келіншектің жағдайы бірқалыпты, перзентханада жатыр. Дәрігерлер оның екі қолы сынғанын айтады.
