Жыл басынан бері Қазақстанның барлық өңірлерінде Мемлекеттік Әлеуметтік қорғау инспекторлары 2126 тексеру жүргізді. Оның 528-і профилактикалық бақылау шеңберінде, 511-і жоспардан тыс, 1087-сі прокуратураның өтініші бойынша, деп хабарлайды kaskelen.kz порталы.
Мемлекеттік бақылауда:
әкімдіктер – 159, жергілікті атқарушы органдардың бөлімдері мен басқармалары – 98, мемлекеттік мекемелер – 67, арнайы әлеуметтік қызмет көрсету орталықтары – 74, оңалту орталықтары – 6, ауруханалар, емханалар — 85, стоматология – 3, санаторийлер – 4, балабақшалар – 407, мектептер – 927, колледждер, лицейлер – 72, дүкендер – 18, сауда үйлері – 26, банк бөлімшелері – 6, “Қазпошта” АҚ филиалдары – 7, полиция бөлімшелері – 9, мәдениет үйлері – 15, мұрағаттар, мұражайлар – 13, кафелер, мейрамханалар, қонақ үйлер – 16, нотариустар – 2, автопарктер, автовокзалдар мен теміржол вокзалдары, әуежайлар – 8, ip – 46, кітапханалар – 4, жасөспірімдер мектептері, спорт мектептері – 13 және басқалары қамтылған.
Мәселен, Еңбек және халықты әлеуметтік қорғау Комитетінің Алматы қаласы бойынша департаменті мүмкіндігі шектеулі адамның өтініші бойынша азық-түлік дүкеніне жоспардан тыс тексеру жүргізді.
Тексеру нәтижелері бойынша кәсіпкерлік субъектісіне айыппұл салынды, сондай-ақ анықталған бұзушылықтарды жою туралы бұйрық енгізілді.
Сонымен қатар, өңірлердегі әлеуметтік инспекторлар мүгедектердің заңды құқықтарын қамтамасыз ету үшін әлеуметтік инфрақұрылым объектілерін бейімдеудің оң динамикасын атап өтті.
Мәселен, мүмкіндігі шектеулі азамат Ерген Бекарыстановтың айтуынша, Оралда ерекше қажеттіліктері бар адамдар үшін кейбір жағдайлар жасалған.
«Киров саябағында тротуардың бойында көру қабілеті нашар адамдарға арналған тактильді бағыттағыштар орнатылды, қала бойынша банктерге, супермаркеттерге, кафелерге кіру мүмкіндігі қамтамасыз етілді. Атап айтқанда, мүгедектігі бар адамдарға арналған тұрақ орындары, пандустар мен кіру топтары стандартқа сәйкес келеді, жалпы қала бойынша инфрақұрылым объектілерін қолжетімділік нормаларына сәйкес келтіру бойынша жұмыс жүріп жатыр. Бұған мен өте қуаныштымын», — дейді Ерген Бекарыстанов.
Естеріңізге сала кетейік, 2023 жылдың 1 шілдесінен әлеуметтік кодекс күшіне енген сәттен бастап елімізде әлеуметтік қорғаудың мемлекеттік инспекторлары институты енгізілді.
