Алтынның бір грамының құны 55 325 теңге шамасында, деп хабарлайды kaskelen.kz порталы.
2025 жылдың 5 маусымында Қазақстанда алтынның бір грамы 55 324,92 теңгені құрайды. Бұл мәліметті Қазақстан Ұлттық банкі ресми түрде жариялады. Салыстырмалы түрде алғанда, өткен аптада, 29 мамыр күні бағалы металдың құны шамамен 54 749 теңге болған еді. Осылайша, бір апта ішінде алтынның құны 575 теңгеге өсті.
Қазақстан соңғы жылдары әлемдік алтын нарығында өз орнын айтарлықтай нығайтты. Ел алтын қоры бойынша ТОП-20 мемлекеттің қатарына енді. Сонымен қатар, соңғы 10 жыл ішінде Қазақстанда алтын өндіру көлемі 2,2 есе артқан.
Дүниежүзілік алтын кеңесінің (World Gold Council) деректеріне сәйкес, 2025 жылдың алғашқы тоқсанында алтынға деген жаһандық сұраныс өткен жылдың сәйкес кезеңімен салыстырғанда 1%-ға өсіп, 1206 тоннаға жетті. Бұл – 2016 жылдан бері бірінші тоқсандағы ең жоғары көрсеткіш.
Алайда орталық банктер бұл кезеңде алтын сатып алуды азайтқан. Алғашқы тоқсанда олар 244 тонна алтын сатып алды, бұл алдыңғы тоқсанмен салыстырғанда төмен көрсеткіш.
Баға өсімінің әсері зергерлік бұйымдар нарығында да байқалды. Жоғары бағалар жағдайында алтыннан жасалған әшекейлерге деген сұраныс күрт төмендеді. Сатылым көлемі 2020 жылдан бері ең төменгі деңгейге дейін түссе де, тұтынушылық шығындар құндық мәнде 9%-ға артып, 35 миллиард долларға жеткен.
Сарапшылардың пікірінше, алтын бағасының өсуі әрі қарай да жалғасуы мүмкін. Бұл құбылыс инфляциядан қорғану құралы ретінде алтынға деген сұраныстың артуымен, геосаяси тұрақсыздықпен және әлемдік қаржы нарықтарындағы өзгерістермен байланысты.
