4 қаңтарға қараған түні Орал қаласында орналасқан дәмханалардың бірінде газ-ауа қоспасының дүмпуі салдарынан өрт шықты. Бұл жөнінде БҚО Төтенше жағдайлар департаментінің өкілдері мәлім етті, деп хабарлайды kaskelen.kz порталы. Видеоны мына сілтеме арқылы көре аласыз.
Ведомство өкілдерінің мәліметі бойынша, оқыс жағдай Сырым Датов көшесі 52 мекенжайындағы дәмханада болған. Жарылыс салдарынан ғимараттың 110 шаршы метр болатын аумағы қирап, 25 шаршы метр аумақты өрт шалған.
“Өрт сағат 02:40-та жойылды. Өртті сөндіруге №1 МӨСБ, № 2 МӨСБ, № 8 ӨСБ, № 5 ӨСБ, өрт сөндірудің кезекші қызметі, жеке құрамнан 39 адам және 13 техника, жедел құтқару жасағының құтқарушыларынан 8 адам және 2 техника жұмылдырылды. Бұған қоса, жедел медициналық жәрдем бригадасынан 18 адам, 6 техника, полиция департаментінен 28 адам, 7 техника тартылды”, – делінген хабарламада.
Сонымен қатар ведомство өкілдері қазіргі уақытта БҚО ТЖД және облыс әкімдігі қираған үйінділерді тазарту жұмыстарын жүргізіп жатқанын мәлімдеді.
Зардап шеккендерге шұғыл психологиялық көмек көрсету үшін БҚО ТЖД штабында 8 (7112) 55-40-88 нөмірі бойынша жедел желі жұмысы ұйымдастырылған.
