Аягөздегі трагедияға қатысты жаңа деректер пайда болды. Нақтыласақ, қара жамылған үйден миллион теңге шамасында қаржы жоғалған. Бұл туралы журналист Нұртай Лахан әлеуметтік желіде жазды, деп хабарлайды kaskelen.kz.
Аягөздегі тұрғын үйлердің бірінде бірнеше апта бұрын өрт шығып, бір отбасының төрт баласы қайтыс болған. Қайғылы оқиға көптің қабырғасын қайыстырған еді.
Онсыз да қайғыдан көз аша алмай отырған әке-шеше тағы да қиын жағдайға тап болды.
“Азаттық” журналисінің айтуынша, үй иелері екінші баласының көзіне ота жасату үшін тірнектеп 900 мың теңге көлемінде қаражат жинаған. Алайда тілсіз жау кезінде оны көмекке келгендердің бірі қолды қылған көрінеді.
Жазбадағы мәліметке сәйкес, үй иелері ақшаның жоғалғаннан кейін полицейлерге күдікпен қарайды. Себебі олар үйді тінту кезінде ешкімді ішке кіргізбеген көрінеді.
“Иә, өрт болған кезде ұрланған дейді. Үйге полиция ешкімді, адамдарды кіргізбей қойды дейді. Қыстық куртқа шкаф ішінде тұрған. Кеуде қалтасынан ақшаны алып, куртканы төсектің үстіне лақтырып кеткен. Полициядан көріп отыр олар. “Басқа ешкім алған жоқ”. Полиция ішке адамдарды кіргізбей қойған дейді. Сырттан бөтен ешкім, үй иелері де кірмеген”, – деп жазды Нұртай Лахан.
Ақпаратқа сүйенсек, төрт бірдей баласын жер қайнауы тапсырған отбасы отағасының айлығы – 80 мың теңге. Ал отанасы болса байлап отырған екі сиырды сауып, сүтті базарға 1500-2000 теңгеден сатқан.
Осылайша бірді-бірге жалғап, күндерін көріп қана қоймай, отаға деп қаражат да жинаған. Енді келіп қомақты қаржыдан да қағылды.
